எழுகவே ! எழுகவே ! எழுகவே ! - தமிழினமே !
எழுகவே ! எழுகவே ! எழுகவே !
உறங்கியது போதும் ! எந்தன் தமிழினமே ! நீ
உறங்குவதால் உந்தன்மொழி நலிகிறதே தமிழினமே !
உறங்கியது போதும் ! எந்தன் தமிழினமே !
பள்ளிகளில் பயிற்றுமொழி ஆங்கிலமா ? - நம்
பணிக்களரி இருப்பதென்ன அயல்நிலமா ?
தாய்மொழியைப் புறக்கணித்து பிறமொழியா ? - இன்று
தறிகெட்டு அலைவது ஏன் தமிழினமே ?
வளர்குழந்தைப் பெயரெல்லாம் வடமொழியில் ! - நமது
வயிற்றுணவு பெயர்தாங்கல் ஆங்கிலத்தில் ! - உடுக்கும்
உடைக்குப் பெயர் வைப்பதெலாம் பிறமொழியில் ! - நாம்
உயிர்வாழும் நிலப்பெயர்தான் தமிழ்நாடா ?
ஆங்கிலத்தைக் கலந்து நாமும் பேசுவதேன் ? - அன்னை
அரியணையில் பிறமொழிக்கு இடமெதற்கு ? - வணிக
நிறுவனங்கள் பெயர்களிலே தமிழில்லை ! - நாம்
நிமிர்ந்து நிற்கும் காலமினி வாராதா ?
சுரணையின்றி வாழ்வதுவும் வாழ்விலையே ! - விழியைச்
சூழ்ந்துநிற்கும் இருள்விலகும் நிலையிலையே ?
செந்தமிழில் குழந்தைகட்குப் பெயர்வைப்போம் ! - தமிழைச்
சிதைத்துவரும் திரையுலகைப் புறக்கணிப்போம் !
பாரதியின் மொழிப்பற்றும் நமக்குஇலை - பாரதி
தாசனவர் பகன்றமொழியும் நினைவு இலை ! - தமிழை
இழந்தபின்பு நமக்கிங்கே வாழ்க்கையிலை ! - சூடு
சுரணையுள்ள தமிழனாக வாழ்ந்திடுவோம் !
இனி வாழ்வோம் வா!
------------------------------------------------------------------------------------
ஆக்கம் + இடுகை,
%20-%20Copy2.jpg)
வை.வேதரெத்தினம்,
(vedarethinam70@gmail.com)
ஆட்சியர்,
”தமிழ்ச் சிப்பி” வலைப்பூ,
திருவள்ளுவராண்டு: 2053, விடை (வைகாசி 07)
(21-05-2023)
---------------------------------------------------------------------------------------
கருத்துகள் இல்லை:
கருத்துரையிடுக