-----------------------------------------------------------------------------------------------------
மின்வாரியத்தில்
பணிபுரியும் பொறியாளர்,
நண்பர் திரு. கிருபானந்தனின் மாமனார்
எழுபதாம் அகவை நிறைவு செய்வதை முன்னிட்டு,
அவரது இல்லத்தினரால் எடுக்கப் பெற்ற விழாவில்,
திரு.கிருபானந்தனால் வாசித்து அளிக்கப் பெற்ற
வாழ்த்துப்பா !
எழுத்து: வை.வேதரெத்தினம்:
வாசிப்பு: திரு,கிருபானந்தன் !
(2019)
(2019)
-------------------------------------------------------------------------------------
வணங்குகிறோம் ! வாழ்த்துங்கள் !!
எழுபதாண்டு நிறைவுபெறும்
..........எம்குலத்தின் திருவிளக்கே !
இராதாமணி மணவாளன்
..........பெயர்விளங்கும் எழில்முகிலே !
பழுமரமாய், ஊருணியாய்,
..........பகலவனாய், திகழொளியே !
பால.புஷ்பா கரம்பிடித்த
..........பால்மதியே ! அருள்நிதியே !
வழுவகல வாழ்வாங்கு
..........வாழ்தகையே ! தீங்கனியே !
வல்லாங்கு வாழ்ந்திடுக!
..........வணங்குகிறோம் ! வாழ்த்துவையே !
செழும்புனலே ! இல்வாழ்வின்
..........செங்கரும்பே ! விழுமியமே !
செந்தூர மரைமலரே !
..........நூறகவை வாழ்குவையே !!
வேளாண்மைக் குடியுதித்த
..........விடிவெள்ளித் திருமுகமே !
விழுதூன்றிச் சாரத்தில்
..........விளைந்திட்ட நென்மணியே !
தாளாண்மை மீதூரும்
..........தரணிபுகழ் தொழில்மகவே !
தண்பொழிலாய் வழித்தோன்றல்
..........வாழ்வுயரச் செய்தனையே !
கோளரிமா மருமகனார்
..........குலம்தழைக்க வாழ்த்திடுக !
கோபுரமே ! நின்குலத்துக்
..........கொடிகளெலாம் வணங்குகிறோம் !
நாளரும்பு மணம்திகழும்
..........நவநிதியே ! வணங்குகிறோம் !
நலமுயர்ந்து யாம்வாழ
..........நான்முகனே ! வாழ்த்திடுக !
கற்றறிந்த பள்ளிகட்குக்
..........கார்முகிலாய் நூல்தந்தாய் !
கனிவுடனே கோவிலுக்குக்
..........கால்பதிக்கக் தளம்தந்தாய் !
பொற்கிழியாய் ஏழையர்க்குப்
..........பொருள்தந்தாய் ! கரம்தந்தாய் !
பொன்றாத புகழ்பூத்தாய் !
..........பூமான்நின் புதல்விகளை
அற்புதமாய்க் கல்வித்தேர்த்
..........தவிசினிலே அமர்த்திட்டாய் !
ஆற்றல்மிகு பொறிஞர்களை
..........அவர்தமக்கும் மணமுடித்தாய் !
பெற்றாயே ! பெயர்விளங்கப்
..........பெயரன்கள், பெயர்த்திகளை !
பெருந்தகையே ! வணங்குகிறோம் !
..........வாழ்த்துவையே, வளம்பெருக !!
-------------------------------------------------------------------------------------
வாசிப்பு: திரு,கிருபானந்தன் !
-------------------------------------------------------------------------------------
ஆக்கம் +இடுகை,
வை.வேதரெத்தினம்,
(vedarethinam70@gmail.com)
ஆட்சியர்,
“தமிழ்ச் சிப்பி” வலைப்பூ,
[திருவள்ளுவராண்டு: 2053, கடகம் (ஆடி) 10]
{26-07-2022}
-----------------------------------------------------------------------------------
கருத்துகள் இல்லை:
கருத்துரையிடுக